ஜப்பான் நாடாளுமன்ற தேர்தல்: ஆளும் கூட்டணி கட்சி மீண்டும் ஆட்சியை பிடித்தது!

ஜப்பான் நாடாளுமன்ற தேர்தலில் பெரும்பான்மையான இடங்களில் ஆளும் கூட்டணி வெற்றி பெற்றுள்ளது.

ஜப்பானில் கடந்த மாத தொடக்கத்தில் ஆளும் தாராளவாத ஜனநாயக கட்சியின் தலைவராக தேர்ந்தெடுக்கப்பட்ட புமியோ கிஷிடா, அந்த நாட்டு அரசியலமைப்பு சட்டத்தின்படி பிரதமராகவும் பதவி ஏற்றுக்கொண்டார். இதை தொடர்ந்து தனது தலைமையிலான புதிய அரசு பணியை தொடங்குவதற்கு முன்பு வாக்காளர்களின் ஆணையை பெற விரும்புவதாக கூறி அதிகாரமிக்க நாடாளுமன்ற கீழவையை கலைத்து, தேர்தல் அறிவிப்பை வெளியிட்டார்.

அதன்படி 465 இடங்களை கொண்ட ஜப்பான் நாடாளுமன்றத்துக்கு நேற்று தேர்தல் நடந்தது. கரோனா கட்டுப்பாட்டு நடவடிக்கைகளை முழுமையாக கடைபிடித்து, பலத்த பாதுகாப்புடன் நடந்த இந்த தேர்தலில் வாக்கு பதிவு விறுவிறுப்பாக நடைபெற்றது. இந்நிலையில்,  வாக்குகள் எண்ணப்பட்டதில் ஆளும் லிபரல் ஜனநாயக கட்சிக்கு 291 இடங்கள் கிடைத்துள்ளன. லிபரல் ஜனநாயகத்தின் கூட்டணி கட்சி 32 இடங்களில் வென்றுள்ளது. தேர்தல் வெற்றி மூலம் புமியோ கிஷிடா, மீண்டும் ஆட்சியை கைப்பற்றியுள்ளார்.  இதன் மூலம் 10வது முறையாக நாடாளுமன்றத் தேர்தலில் புமியோ  கிஷிடா வெற்றி பெற்றுள்ளார்.