கரோனா வைரசுக்கு எதிராக உலகமே போரில் ஈடுபட்டுள்ளது: அமெரிக்க அதிபர் டிரம்ப் கருத்து

கரோனா வைரசுக்கு எதிராக உலகமே போரில் ஈடுபட்டுள்ளது என்று அமெரிக்க அதிபர் டிரம்ப் கூறியுள்ளார்.

அமெரிக்காவில் கரோனா வைரசுக்கு 100 பேர் பலியானநிலையில், அதிபர் டொனால்டு டிரம்ப் நிருபர்களுக்கு பேட்டி அளித்தார். அவர் கூறியதாவது: கண்ணுக்கு தெரியாத எதிரியுடன் நாம் போரில் ஈடுபட்டுள்ளோம். நாம் மட்டுமின்றி, உலகமே போரில் ஈடுபட்டுள்ளது. கண்ணுக்கு தெரியாததாக இருந்தாலும், உலகமே தெரிந்து கொண்ட ஒன்றாகி விட்டது. நிச்சயமாக அந்த எதிரியை வீழ்த்துவோம். அதற்காக எல்லா வளங்களையும் பயன்படுத்துவோம்.

இந்த பிரச்சினைக்கு நாம் தீர்வு கண்ட பிறகு, வழக்கமான பணிகளுக்கு விரைவில் திரும்பலாம். அதுவரை பொதுமக்கள் தங்கள் வீடுகளிலேயே இருந்து வாழ்க்கையை மகிழ்ச்சியாக கழிக்க வேண்டும். உலகத்தில், பாதிப்பு இல்லாத நாடுகள் பட்டியலில் அமெரிக்காவை நிச்சயம் இடம் பெறச் செய்வேன். இந்த போரில் நாம் வெற்றிபெற காலதாமதம் ஆவது நல்லது அல்ல. இவ்வாறு அவர் கூறினார்.