கொழும்பில் குண்டுவெடிப்பு தாக்குதல் நடந்த தேவாலயத்தில் பிரதமர் மோடி அஞ்சலி

மாலத்தீவு பயணம் நிறைவடைந்து அங்கிருந்து புறப்பட்ட பிரதமர் மோடி ஞாயிற்றுக்கிழமை இலங்கைக்கு சென்றார். அவரை கொழும்பு பண்டாரநாயகே  சர்வதேச விமான நிலையத்தில் பிரதமர் ரனில் விக்ரமசிங்கே நேரில் முறைப்படி வரவேற்றார். இலங்கையில் ஈஸ்டர் பண்டிகையன்று நடந்த குண்டுவெடிப்பில் 11 இந்தியர்கள் உள்பட 250க்கும் மேற்பட்டோர் கொல்லப்பட்டனர்.  இந்த தாக்குதல் சம்பவத்திற்கு பின்பு, பிரதமர் மோடிதான்  அங்கு சென்றிருக்கும் முதல் வெளிநாட்டுத் தலைவர். குண்டு வெடிப்பில் இறந்தவர்களுக்கு அஞ்சலி செலுத்தினார் பிரதமர் மோடி.

அதிபர் சிறீசேனாவின்  செயலகத்தில் மோடிக்கு அதிகாரப்பூர்வ வரவேற்பு அளிக்கப்பட்டது. தொடர்ந்து அதிபர் சிறிசேனாவை மோடி சந்தித்து பேசினார்.   இந்தியப் பிரதமர் மோடிக்கு மதிய விருந்து அளித்தார் இலங்கை அதிபர் சிறிசேனா. எதிர்க்கட்சித் தலைவர் மகிந்தா ராஜபக்சே தலைமையிலான எதிர்க்கட்சித் தலைவர்கள் குழு, பிரதமர் மோடியை சந்தித்து பேசியது.  இலங்கைத் தமிழர்களின் முக்கிய கட்சியான தமிழ் தேசிய கூட்டமைப்பின் பிரதிநிதிகளும், சம்பந்தன் எம்.பி. தலைமையில் பிரதமர் மோடியை சந்தித்துப் பேசினர். பின்னர்  பொதுமக்களுடன் மோடி உரையாடினார்.  இந்த நிகழ்ச்சிக்கு பின் பிற்பகலில் பிரதமர் மோடி இலங்கையில் இருந்து  இந்தியா திரும்பினார். இலங்கைக்கு பிரதமர் மோடி வருகையை முன்னிட்டு அந்நாட்டு போலீசார், போக்குவரத்து கட்டுப்பாடுகள் உள்ளிட்ட பல்வேறு பாதுகாப்பு நடவடிக்கைகளை விரிவான அளவில் செய்திருந்தனர்.